Isang pulis ang nasawi matapos barilin ng hindi pa nakikilalang salarin sa Cabuyao, Laguna Huwebes ng umaga.

Habang sakay at nagmamaneho ng kanyang motorsiklo sa Yulo Road sa Barangay Pitland bandang alas-9:40 ng umaga, kahit suot nito ang kanyang uniporme ay binaril pa rin ang biktimang nakilala na si Police Staff Sergeant Christian Ramos.

Nakasakay din umano ng motorsiklo ang salarin, ayon sa ulat ng Cabuyao City Police.

Habang narekober naman ang 6 na basyo ng bala ng 9mm at tatlong basyo mula sa kalibre .45, napagalaman na nagtamo ng tama ng bala sa mukha, ulo at dibdib ang biktima.

Sinasabing pauwi na si Ramos sa Calaca, Batangas mula sa Camp Vicente Lim sa Calamba, Laguna kung saan siya nakadestino ng mangyari ang insidente.

Sa kasalukuyan ay naka-assign si Ramos sa Regional Personnel Holding and Accounting Section ng Calabarzon Police.

Ayon sa pulisya, nag-AWOL si Ramos sa dating poste nito sa Batangas mula Agosto 2020. Na-reinstate siya nitong Disyembre at nailipat sa RPHAS.

Bukod dito, may kinakaharap umanong administrative case ang biktima para sa grave neglect of duty at sa apat na buwang pagiging AWOL niya.

Patuloy pang iniimbestigahan ang motibo sa pamamaril.